Goyang Asyik!


            “Lha piye, Mas, wis bolak balik dikandani ora kenek. Wis mangkel aku.”

            “Lha saiki areke ndok ndi?”

            “Mbuh. Tak jarne, mulih ora karepe.”

            Diman nyedot rokoke. Arif, tanggane sing biasa dodolan plastik-plastik perkakas omah lagek dolan. Wong lanang sing sik setaunan manggon nang sebelah omahe Diman iku lagek curhat.

            “Jawaku ngunu tak jak rene ki ben ngerti, Mas. Cemburuane ki ora karuan. Ora ngerti golek duit ki angel, sik dicemburoni barang. Awal nang kene kae lak sampeyan ngerti dhewe, njaluk mulih terus. Ora penak jare, panas lah, mambu lah, kabeh dicacati. Ning nang omah, adoh, yo ngunu iku. SMS telat sithik lek mbales ae wis ngamuk, nangis-nangis…”

            “Lek nesu ki elek, Mas. Piring gelas dibantingi…”

            “Trus diemplok?” takone Diman.

            “Yo ora, mosok jaranan. Entek barang nang omah dipecahi. Tak tapuk ki saking wis jegeg aku…”

            “Yo sing sabar, bojomu ki sik arek. Diajari tapi yo kalem ae, ojo maen tangan ngunu…”

            “Wis mbuh wingi iku, untung ae onok Mbak Wiji wingi. Lek ora ngunu mbuh dadi opo bocahe…”

            “Ngunu iku gak ngatasi tapi malah nambahi perkoro. Dadi wong lanang yo iku ujiane, kuat gak ngge ngajar bojo tapi ngge njogo.”

            “Sampeyan enak ngomong ngunu wong bojomu pinter, ora kaya bojoku. Uripe sampeyan yo penak.”

            Diman mesem.

            “Yo gak trus mung nyawang saiki, ngunu iku yo ono prosese. Jaman biyen aku karo bojoku yo susah, gak langsung kaya ngene.”

            “Mangkel mangkel tak pegat ae bocahe. Wis ora kuat aku, ngaleme kenemenen. Dolane iku lak karo cah lanang-lanang enom-enoman, Mas. Diluk-diluk nang mall, cekelane nang ndi-ndi HP. Kelet wis kui HP-ne nang tangane, ora tau didekekno.”

            “Yo wis dipenakno dhisik atine, gak usah kesusu. Lek ancen kudu ngadoh sik gak popo, kudu ngunu malah cek padha enake tapi yo ojo trus ngko dijarno. Anake uwong iku sing wis dadi tanggunganmu…”

            Arif meneng. Raine ketok kucel. Wong lanang loro iku akhire mung meneng karo ngenakno lek rokokan.

            “Mas, kui rame-rame ko njero omahmu sopo?”

            Diman mesem.

            “Yo iku obat stressku.”

            “Heh? Obat stress piye?”

            “Urip ki yo kudu mikir tapi yo gak usah nemen-nemen. Ayo mlebu, deloken dhewe.”

            Diman ngadeg. Arif melu ngadeg terus ngetutno.

            “Kau masih gadis atau sudah janda? Baik katakan jangan malu-malu…”

            “Sik prawan rek, sik kinyis-kinyis ngene.”

            Nang ngarep tipi Wiji karo Tomin lagi nyanyi karo njoget. Wiji nyekel sulak sing digawe mic, Tomin nyekel sapu.

            “Goyang terus, Mak, sampek elek!”

            “Asek!” saure Wiji.

            “Pak, ayo rene. Duel karo Mak,” celuke Tomin ngerti ono bapake.

            Diman mesem. Arif sing ndelok yo melu mesem.

            “Ganti lagune,” omonge Diman.

            “Opo, Pak? Sing Anang karo Syahrini yo?” takone Tomin.

            “Anang karo Ashanty saiki, wis ganti,” sauté Wiji.

            “Didi Kempot ae,” saure Diman karo maju nang ngarep tipi.

            Tomin ngganti VCD-ne. Dilebokno VDC lagu-lagune Didi Kempot sing dijaluk bapake.

            “Lagu iki khusus ngge bojoku sing semok dhewe, Dek Wiji binti Ngatiman. Kedanan saka Didi Kempot…”

            “Asek! Ayo Lik Arif melu goyang sisan,” bengoke Tomin.

 

“Aku gandrung gandrung…gandrung tenan
Karo kowe…aku kedanan
Mangan tempe wis bosen kepengen tahu,
Opo kowe ra kroso yen aku gandrung kepincut (karo ayumu)…”

 

Omah sing mau wis rame mergo suwarane Tomin karo emake saiki selot rame. Bapak, emak karo anak iku ketok asik nyanyi karo njoget. Arif sing mau mung mesam mesem ora kuat, akhire melu njoget sisan.

 

“Aku Layang Suwara, Min!” bengoke Arif.

“Siap, Lik!”

 

“Layang sworo ra iso ngobati
Rasa kangen marang sliramu…..yai
Layang sworo ra iso ngganteni
Kulino aku nyanding sliramu …yai”

 

***

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s