Rewel


Bruk!

Ndemin nguncalno tas sekolahe nang dukur mejo. Arek kelas siji esde iku kethok mangkel raine. Lambene mecucu. Keringete ndrodos kethok soko seragame sing teles. Gurung lego lek olehe mbanting tas, Ndemin nyopot sepatune athek sikil karo setengah dijejeki cek sepatune mlayang.

“Lapo koen iku? Muleh sekolah mecucu ae?” takone Paijo sing kaet njedus soko pawon.

Ndemin meneng, gak nyauri. Bokonge dibantingno nang kursi.

“Aduh!”

Lali lek kursine soko kayu, Ndemin kelaran. Bapake sing ndelok mung gedek-gedek. Karo mecucu, Ndemin mulai ngomong.

“Pak’e, aku tukokno sepatu bal!”

Paijo meneng. Pantes mecucu ae, biasa muleh sekolah langsung nang pawon, mangan, batine Paijo.

“Gawe sepatumu iku lak iso,” saure Paijo.
“Gak oleh yo. Iki kan nggo sekolah, ngko rusak. Masio tho iki yo wes rusak,” omonge Ndemin karo sik mecucu.
“Lek omong ki sing nggenah ojo karo mecucu. Maleh eling silite pitik lek kate nelek,” jare Paijo karo ngempet ngguyu.
“Pak’e ki mesti kok, malah diguyoni. Aku ki temenan!”

Paijo meneng, guyune diempet. Tiwas selot ngamuk ngko anake. Paijo melu lungguh nang ngarepe Ndemin.

“Biasane lek bal-balan yo gak gawe sepatu ae lho. Malah enak tho iso koceh lek pas udan. Ngko lek gawe sepatu ngene’i koncone yo loro, wong liyane yo gak gawe,” omonge Paijo kalem.

Ndemin ngadek. Raine sik mecucu. Tas’e karo sepatune dicandak. Raine pak’e disawang.

“Mesti ngono ngomonge, omong ae gak duwe duit,” jare Ndemin karo ngaleh, mlebu kamar.

Paijo kaget tapi trus meneng. Yok opo maneh, batine.

***

Paijo kaet nelehno sepeda, moro-moro soko omah anake sing nomer loro mlayu nyedeki.

“Pak’e teko! Pak’e teko!” bengoke Ndemin 2 karo mesam-mesem.

Dingaren teko-teko disambut eseman, onok opo batine Paijo.

“Kesel, Pak?” takone Ndemin 2.
“Gak, biasa ae,” saure Paijo.
“Yo mesti kesel no, wong mari macul,” jare Ndemin 2, mekso.

Paijo mesem. Anake sing nomer loro iki ancen paling nggemesno. Paling doyan mangan, omongane yo mesti onok ae. Blejet koyok mak’e. Eling bojone, bathuke Paijo langsung mengkerut. Koyok mak’e.

“Pak, aku tukokno tipi,” omonge Ndemin 2 karo masang wajah melas.

Temenan kan, batine Paijo. Sik ae dibatin. Mesam-mesem gak jelas ki mesti onok karepe. Lek gak dituruti ngko lak mecucu, nesu. Paijo muter utek. Ndemin 2 gurung disauri. De’e mlaku mlebu nang teras. Mending ngisis sik lek koyok ngene, batine. Ndemin 2 melu mlebu tapi gak mandek nang teras. Arek sing gurung genep limang taun iku mlebu nang pawon. Gak suwi de’e metu karo nggowo banyu putih nang gelas.

“Mimik sik, Pak,” omonge karo ngelungno gelas nang Paijo.

Paijo kaget tapi epok-epok tenang. Angel iki ngko lek ngrayu, batine. Tiwas wes diladeni koyok rojo lek sampek gak diiyani penjaluke iso ciloko aku, batine Paijo.

“Wou…arek pinter. Suwun. Kok ngerti ae lek pak’e ngelak. Bener sisan omongmu, mari macul ki kesel ancene. Golek duit nggo tuku beras karo jajan ae sampek kringeten gak mari-mari. Untung anake pak’e iki pinter. Gak njalukan, gak tukang jajan. Pinter pokoke.”

Ndemin 2 sing mau mesam-mesem langsung meneng. Lambene rodo maju sithik. Motone sing bunder kethok selot ombo.

“Aku gak jaluk jajan. Jaluk tipi,” omonge Ndemin 2 lirih.

Paijo nelehno gelase. Ambegane diatur. Pas kate nerusno omongane, Ndemin 2 ndisiki.

“Mosok yahmene tipine sik hitam putih ae. Aku kan kate sekolah, kudu blajar warna-warna. Ngko lak isin karo bu guru lek gak iso apal warna-warna.”
“Blajar warna kan iso soko endi ae, gak soko tipi. Lagian tipi saiki to elek-elek acarane. Sinetron thok, gak mutu. Mending blajar langsung soko buku. Ngko pak’e golekno buku-buku cerito sing akeh gambare, sing reno-reno warnane,” saure Paijo.

Ndemin 2 meneng. Melu-melu muter utek nggo golek alasan. De’e wes suwe kepingin tipi berwarna koyok omah-omahe tonggone. De’e yo sering diilok-ilokno koncone. Mosok kaet jaman merdeka sampek kate dijajah maneh tipine sik hitam putih ae.

“Lha aku bingung pak. Mosok pas nontok Power Rangers warnae podo. Aku kan Ranger Biru.”
“Kan onok jenenge, yo diapali jenenge,” saure Paijo gak gelem kalah.
“Kan gak mesti omong jenenge. Mung, Berubah! Ngunu ae,” jare Ndemin 2.
“Adike nang ndi?” takone Paijo, nylimur.
“Aku jaluk tipi!” bengoke Ndemin 2.
“Yo sabar, jare pinter?”
“Yo pak yo, tipi berwarna sing cilik yo gak popo,” omonge Ndemin 2 karo mulai kate nangis.
“Oalah yo…yo. Makmu nang ndi iki?”
“Tipi! Tipi, pak’e! Aku jaluk tipi!”

Bingung diapakno maneh, Paijo mlebu nang omah, goleki bojone. Ndemin 2 sik bengok-bengok karo nggandoli klambine. Lek wis ngene ki mung bojone sing iso ngenengno.

***

“Pak,” celuke Narti kalem.

Paijo sing wes merem nang sandinge gak nyauri.

“Pak,” dibaleni maneh karo rodok banter.
“Opo?” saure Paijo, gak dibukak motoe.
“Sesuk lak minggu, nang bonbin yuk. Suwi gak dolen rono,” omonge Narti karo mesam-mesem.

Paijo sik merem. Masio gak nyawang bojone de’e iso mbayangno rupane Narti saiki. Mesti bojone iku lagi mesam-mesem karo setengah mecucu. Tangane Narti ngelus-elus dodone. Abot, batine Paijo. Lek anak-anake sing njaluk, paling banter yo nangis lek gak dituruti. Lha lek mak’e sing njaluk lek ga dituruti yo ruwet. Narti paling betah lek kon mecucu.

“Sesuk onok kerjoan,” saure Paijo.
“Sesuk lak minggu sih, wayahe leren.”
“Padakno pegawe ae, wong macul ae lho,” saure Paijo maneh.
“Masio macul ki butuh istirahat, Pak. Awake dijogo, kerjo terus lek kesel trus loro lak malah repot,” omonge Narti.
“Ojo sesuk, minggu-minggu ngarep ae.”
“Lha pingine sesuk.”

Soko nadane, Paijo ngerti lek saiki lambene Narti wes mecucu. Siap-siap ae, batine. Kate mbukak motone Paijo gurung siap, ngko gak tego. Akhire diterusno merem. Meneng-menengan suwi Paijo yo gak betah. Pas melek sing didelok gegere bojone. Nesu mesti, batine. Paijo ngukuri gundule. Gak iso turu maneh, Paijo tangi. Anake lanang nomer telu ternyata pas nglilir. Bayi iku meneng ae karo dolenan idu. Dicandak anake trus digendong.

“Ojo melu-melu rewel yo, arek bagus,” omonge nang Ndemin 3.

***

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s