Cerewet


            Ndemin, lagi ae teko, sik kate ndekekno bokonge nang kursi pas moro-moro mak’e, Supinah, njedul nang ngarepe irunge. Meh ae Ndemin njumbul saking kagete.

Supinah           : Min, sidane kapan? Ojo suwi-suwi.

Ndemin           : Apane sing sido?

Supinah           : Lah, malah takok. Yo kon iku lho kapan sido karo Ratemi?

Ndemin           : Sido apane?

Supinah           : Woo…congok pisan arek iki. Kon iku lak lagi pacaran karo Ratemi a? Ojo suwi-suwi, timbang meteng areke ngko aku sing repot.

Ndemin           : Alah mak…mak, pacaran sik kaet ae wes kon rabi. Santi!

Supinah           : Santi? Wes ganti ta? Cepetmen?

Ndemin           : Mbuh! Sampeyan iki ancen gak gaul.

Supinah           : Malah ngilok-ngilokno wong tuwek. Kualat kon ngko!

            Kesel nyauri emake, Ndemin langsung ngadek, ngaleh. Arek lanang sing tas muleh kerjo iku bablas nang pawon, kate mangan. Mak’e sing sik ngomel dijarno ae. Rumongso gak digatekno karo anake, Supinah nggondok. Wong wedok iku melu mlebu nang pawon.

Supinah           : Kere! Dijak omong mak’e malah ditinggal mbadok!

            Ndemin wes apal modele emake. Emake iku ancen terkenal cerewet. Kadang de’e mikir kok kuat bapake urip karo emake. Ben dino dikabruki. Gak bener sithik diomeli. Onok ae sing dicocoti. Kaet tangi turu sampek budal turu maneh, suarane emake gak tau sepi. Malah seringe turu ae sik nglindur, ngomel dewe.

            Biyen pas cilik de’e sik trimo ae. Gak wani tepate. Selot gede selot angel nompo kelakuan emake sing sik seneng ngomel iku. Mosok joko koyok de’e sing wes sunat bola-bali sik ae diomeli koyok arek teka. Isuk lek durung tangi diuyaki, kadang malah disiram banyu. Wes tangi kate rokokan diluk a ewes dijenggongi, dikongkon ndang adus cek gak telat budal kerjo jare. Muleh kerjo kate dolen, nyangkruk karo arek-arek sik dicocoti maneh. Jare gak usah nyangkruk karo arek-arek gak genah, turu ae cek sesuk gak males lek tangi. Lha saiki, sik kaet ae pacaran karo Ratemi wes diuyaki kon rabi.

***

            Ndemin njagang sepedae nang teras. Gak dilebokno polahe kate digawe maneh. Sikili kate ae nyandak lawang pas suoro sing de’e apal banget moro-moro metu koyok bledek.

Supinah           : Lapo gak dilebokno sisan sepedae? Saiki lagi usum maling. Ilang mbuh ngko sepedamu.

            Gak pingin tukaran tapi yo gak pingin nuruti emake, Ndemin mbidek ae. Bablas mlebu omah, lungguh nang kursi trus nyopot sepatune.

Supinah           : Arek kok lek dikandani angel eram. Selot gede bukane nyenengno wong tuwo malah ngejak gelut senengane.

Ndemin           : Opo sih mak? Aku iki kesel, tas muleh kerjo. Ngomel ae sih.

Supinah           : Woo…wani kon karo emakmu? Wes rumongso sugeh kon?

Ndemin           : *Mangkel tapi diempet* Gak. Kualat ngko lek wani karo wong tuwo.

Supinah           : Lapo sepedamu gak mbok lebokno sisan?

Ndemin           : Aku kate metu ngko, timbang ngetokno maneh.

Supinah           : Kate nang ndi? Kerjo wes kesel kok kate ngluyur.

Ndemin           : Sediluk, ketemu koncoku.

Supinah           : Kate pacaran ta?

Ndemin           : Gak. Ketemu konco sekolah biyen.

Supinah           : Lapo gak? Duwe pacar kok malah ketemuan karo konco.

            Ndemin ambegan dowo. Rasane kudu nguntal mejo nang ngarepe tapi pisan maneh diempet. Awake sing kroso kesel disendeno nang kursi. Emake sik ngadek nang ngarepe.

Supinah           : Ayo, sidone kapan? Aku tak siap-siap. Ojo ndadak lek omong.

Ndemin           : Apane?

Supinah           : Takok maneh. Yo lek mu arep rabi iku lho kapan? Wong yo wes kerjo, kurang opo maneh?

Ndemin           : Sik suwi. Sampeyan tenang ae.

Supinah           : *Kaget* Sik suwi? Lapo suwi-suwi? Kandani ojo suwi-suwi, mumpung aku sik kuat dadi iso nyiapno sembarang kalir.

Ndemin           : *Ngadek* Aku wes putus.

Supinah           : Putus? Lapo?

Ndemin           : Gak lapo-lapo, pingin ae.

Supinah           : Kon putus? Gak sido rabi la’an? *lemes*

Ndemin           : Hooh, gak sido *santé*

Supinah           : Trus kainku wingi tak nggo opo? Aku wes tuku kebaya, jarik, wes pesen pangganan. Aku yo wes ngomong nang Pak De mu kate nyilih sapine siji nggo resepsimu. Trus iku jaranane yok opo? Aku wes ngomong nang Lik Paiman kate nanggap jaranan nggo kawinanmu… *ngomel karo membik-membik*

Ndemin           : Oalah mak…mak, pacaran sik rong dino ae wes tok uyaki kon rabi. Yo mending aku putus ae. Beres!

            Krungu omongane Ndemin, sikile Supinah langsung grewelan, selot lemes. Wong wedok sing tibake meneng-meneng wes nyiapno sembarang kalir nggo kawinane anak lanange iku langsung ambruk. Bapake Ndemin sing kaet teko kaget ndelok bojone glesotan nang lante.

Paimo              : Loh, Min, lapo makmu iku?

Ndemin           : Mbuh mak iku. Wes gede kok sik seneng glesotan. Turu nang kasur lak enak sih *ngomong santé trus ngaleh, mlebu kamar*

***

4 thoughts on “Cerewet

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s