Wayahe Pacaran


dudu potone sing nulis, sumpah! (nyilih lek google)

Itak karo koncone, Nanik, mlaku nang pinggir embong. Arek loro sing sik sragaman abu-abu iku lagek muleh sekolah. Bedo karo Nanik sing ketok mbesengut mergo kepanasen plus luwe, Itak ketok sumringah, seneng. Kaet isuk ancen raine ketok bedo. Itak sing biasane judese gak ketulungan isuk mau teko nang sekolahan karo mesam-mesem. Pas pelajaran arek sing biasane keturon lek lagi diajar iku masio gak ketok nggatekno pelajaran tapi gak turu blas. Motone melek ombo malah. Sediluk-sediluk nglirik jam. Gak suwe moro-moro mesem dewe. Nanik sing penasaran akhire takok.

“Ciee, lagi seneng ketoke. Bagi-bagi po’o. Kate ditukokno sepada ta karo bapakmu?”

“Sopo?” epok-epok gak ngerti.

“Tukang parkir! Yo sopo maneh sing lagi mlaku karo aku lek guduk kon. Semonone rek lek lagi seneng, sampek lali konco.”

Itak mesem, garai Nanik selot penasaran. Gak trimo mung diesemi thok, Nanik mekso Itak cerito opo sing garai de’e ketok seneng.

“Aku ngko kate kencan,” akune Itak.

“Heh! Temenan? Emang kon wes oleh pacaran karo bapakmu?”

“Oleh no, aku! Wingi aku nangis-nangis, tak ewangi gak mangan sedino cek pakku gak tego. Hahaha!”

“Trus akhire diolehi pacaran? Oleh metu wong loroan?” Nanik sik gak percoyo.

“Hooh. Pakku wedi lek aku koyok arek-arek nang tipi-tipi iku sing akhire kendat mergo gak diolehi pacaran. Padahal aku mung mbujuk ae, epok-epok soale lek gak ngunu ngko gak diolehi terus. Yo isin lah, mosok wes gede ngene pacaran ae gak oleh.”

Motone Nanik mendelik, sik gak percoyo. Nanik ngerti banget bapake Itak koyok opo. Gak galak sih, seneng guyon malah tapi lek masalah sing sithok iku Nanik ngerti dewe bapake Itak duwe aturan sing ketat.

“Asik la’an. Cobak aku yo duwe pacar lak kene iso dolen bareng yo?”

“Kon sih kakean milih. Iwan iku lak seneng sih karo kon. Tompoan ae lah.”

“Ra sudi! Arek koyok gagang sapu ngunu kok kon nrimo. Males a!”

“Masio koyok gagang sapu tapi lak tumpakane sip iku.”

“Tumpakane sip tapi lek ngowoh ae yo males.”

Itak ngguyu banter krungu jawabane Nanik. Lek dipikir ancen eman Iwan iku. Anake wong sugih, tumpakane sip tapi senengane ngowoh koyok arek goblog. Untung-untung gak ngecesan. Teko omah Itak sik ae nerusno lek mesam-mesem. Bapake karo emake mung pandeng-pandengan ndelok polahe anak wedoke iku. Sore bar magrib Itak wes dandan ayu. Lek njajali klambi mbuh wes ping piro. Kudu maksimal jare polahe kencan pertama karo Narto, pacare.

Narto wes teko. Gak mlebu nang omah tapi ngenteni nang pinggir embong. Arek lanang sing tas ditompo cintane sedino iku ketok klimis. Kumise sing sik tas tukul disisir alus. Kaose anyar. Clono jeanse model arek gaul saiki, skinny. Sepeda motore cinclong, tas diumbah. Itak wes siap-siap kate metu, nemoni pacare pas moro-moro bapake metungul soko kamar.

“Kate nang ndi?” takone.

“Pacaran lah! Kan wingi wes oleh jare sampeyan.”

“Iyo tapi kate pacaran nang ndi?”

“Paling-paling nonton trus mangan bakso.”

Itak ngambung tangane emake, pamit. Pas kate ngambung tangane bapake tangane malah digondeli. Itak ndongak, kaget.

“Gak oleh nang peteng-peteng.”

“Gak pak. Nonton…nonton, nang bioskop iku lho.”

“Lek ngunu lampune gak oleh dipateni.”

“Gak oleh dipateni yok opo? Yo lek wes main filme yo mesti dipateni, ndeso sampeyan iki pak. Dipadakno layar tancep ae,” saure Itak karo mbesengut.

Emak ngaleh, mlebu nang pawon, gak katene melu-melu bapak karo anak sing koyok kucing karo tikus iku.

“Gak oleh gremet-gremetan, gak oleh cipokan, gak oleh…”

“Halah. Gak…gak!”

“Jakete gak oleh dicopot.”

“Gak. Tak gawe terus, lagian adem nang bioskop iku, onok ACne. Wes ta lah, koyok kate lapo ae.”

Itak mrengut. Wes dandan ayu-ayu malah dijak gelut. Motone nglirik nang embong. Sik dilirik kroso trus noleh. Atine sing mbedodok goro-goro bapake langsung ilang.

“Yo wes kono budal. Gak oleh bengi-bengi. Jam songo kudu wes nang omah.”

“Lah, wong filme main jam pitu. Durung mangane,” Itak protes.

“Mangan paling limang menit.”

“Jam sepuluh yo?”

“Songo seprapat!”

“Halah. Sepuluh kurang seprapat wes, yo pak?”

“Setengah sepuluh. Wes gek ndang budal, selak wektumu entek.”

“Asik! Suwun pak, bapak ancen suip, sangar! Hehehe. Pamit sik yo pak.”

Itak nyaut tangane bapake trus ndang-ndang diambung. Selak gak pingin mbuwak wektu, gak kanten kate kencan karo Narto. Lagek kate mlayu, bapake mbengok maneh.

“Heh! Adekmu ketinggalan!”

Itak mandek, matung. Motone mbukak ombo, menteleng. Gak percoyo karo opo sing dirungokno kupinge de’e meneng. Mung motone plilak plilik. Adeke, Budi, sing sik umur pitung taun metu ko kamar karo mesam-mesem. Dandane gak kalah rapi karo Narto. Gawe topi karo kocomoto ireng.

“Wes kono, adeke digandeng. Ojok ditinggal,” omonge bapake.

“Heh? Budi melu?”

“Hooh no!” saure Budi karo mlaku mengarep, marani Narto.

Motone Itak selot ombo. Lambene mangap, ngowoh.

“Lah, gak ndang budal? Kae wes dienteni pacarmu. Cakot semut ngko areke.”

“Lapo Budi kok melu?”

“Pilih endi, adekmu diajak opo gak usah pacaran?” jare bapake.

“Halah pak, ngko lek areke nangis yok opo? Iki lho kate nonton film, gak oleh arek cilik iku nang bioskop.”

“Jare sopo? Thok pikir bapakmu iki goblog ta? Ngene-ngene aku yo wes tau mlebu bioskop. Aku mau yo wes ndelok nang koran, onok Kungfu Panda, nonton iku ae. Adekmu lak seneng.”

Rasane kudu nangis tapi Itak mung iso meneng ae. Musuh bapake ancen gak gampang. Meneng suwe, de’e mikir. Nang pinggir embong adeke wes numpak motor, nang mburine Narto. Arek lanang iku ketok seneng, malah dada-dada nang mbakyune karo bapake. Narto mung mesam-mesem.

“Jam setengah pitu luweh sepuluh menit, ngko jam setengah sepuluh kudu wes nang omah.”

Omangane bapake langsung nyadarno Itak sing sik ngowoh-ngowoh. Atine gak trimo tapi kate yok opo maneh. Timbang gak sido budal, sesuk isin lek ditakoni Nanik mending budal masio ngko lek konangan koncone iso bakal luweh isin maneh.

“Awak,” bisike lirih.

***

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s