VOUCHER SALON


            “Dek, tangi. Wes isuk.”

            Retno mulet sediluk, mbenakno selimute trus meneng maneh, turu. Joko, bojone, mendelik motone ndelok Retno sing sik ngenakno lek turu.

            “Lha kok malah dienakno lek mlungker? Tangi!”

            “Opo sih, Mas, rame ae?”

            “Opo yok opo karepmu? Tangi, srengengene wes duwur kae lho. Aku kate budal kerjo. Mari ngene lak anakmu tangi.”

             Retno mulet maneh. Disawang bojone sing ngadek nang sandinge kasur.

            “Aku kate turu sedinoan. Ojok diganggu!”

            “Lha trus? Sopo sing kate ngurus omah? Sopo sing kate ngurus anakmu?”

            “Sampeyan.”

            “Trus sopo sing kerjo, golek duit?”

            ”Halah, wong mbecak ae nggaya. Kerjo opo? Paling yo olehe semunu-semunu ae. Pokoke dino iki sampeyan sing ngurus omah, ngurus anak. Awakku kesel kabeh, kate turu.”

            ”Trus lek aku ga budal kerjo awake dewe kate mangan opo?”

            ”Aku ngko sing kerjo.”

            ”Kerjo opo?”

            ”Adol jarik.”

            ”Heh? Lha jarike sopo sing tok dol? Wes kulakan opo?”

            Retno mlerok, mangkel bojone takok ae. Joko sik ngadek nang sandinge kasur, bingung karo kelakuan bojone sing aneh.

            ”Jarike lek ngewei emak biyen.”

            ”Yo iku dudu dodolan jenenge tapi leles-leles. Wes gek ndang tangi.”

            Joko metu soko kamar trus mlebu kamar mandi, adus. Retno sik uglak-uglik nang duwur kasur. Gak let suwe anake sing umur telung taun, Panjul, tangi. Arek cilik iku langsung ngadek, goleki emake.

            ”Mak, mik cucu,” omonge karo nariki selimute Retno.

            ”Haduh, kon ngawekno bapak kono lho.”

            ”Emoh, cucu! Cucu!” kate nangis.

            ”Mas! Mas! Ki lho anakmu njaluk susu!”

            Joko sing wes mari adus krungu rame-rame langsung mlebu kamar.

            “Opo sih, rame ae?”

            “Gawekno susu anakmu.”

            “Lha iku lak anakmu pisan.”

            Panjul sik gak sabar selot banter lek nangis. Retno sik mbidek ae, gak gelem ngaleh soko kasur.

            ”Oalah dek…dek, kon iki kok onok ae.”

            ”Bahno! Pokoke dino iki smapeyan gak usah kerjo, urusen iku anakmu!”

            Joko nyupuk ambegan dowo. Disawang bojone sediluk.

            ”Ayo le, karo bapak ae. Jarno emakmu.”

gambar nyilih lek google

            Joko gendong anake sing sik nangis. Arek cilik iku dieneng-eneng trus digowo nang pawon. Gak suwe omah wes sepi, gak onok suoro. Retno sik ngenakno lek turu. Keenakan gak onok sing ganggu, gak kroso wes awan. Mbuh wes pirang jam lek Ratna turu. Tangi-tangi omahe wes resik. Kumbahan wes podo dijemur. Anak karo bojone gak onok nang omah tapi Retno gak bingung. Kroso luwe Retno mlaku nang pawon. Nang duwur mejo wes onok sego sak lawuhe. Masio durung adus Retno langsung mangan. Saking senenge gak kroso de’e mesam-mesem dewe.

            ”Wes tangi kon dek,” moro-moro Joko mecungul nang pawon karo anake.

            Kaget ndelok bojone, Retno mlongo. Joko mesam-mesem. Anake didukno soko gendongane. Pajul yo gak kalah seneng, arek cilik iku ketok asik njilati es krim.

            ”Sampeyan ko endi, mas?”

            ”Soko salon no. Suwun lho dek, enak ancene nang salon,” saure Joko karo sik mesam-mesem.

            ”Sing mijeti ayu-ayu maneh. Jan sip!” teruse.

            ”Ko salon? Gawe duite sopo?”

            “Iki mau onok Pak Pos ngeteri surat. Tak bukak kok tibake isine voucher nang salon Barbara.”

            Huaaaaaaaaaaaaaaaaaaaaaaaaaaaaaaaaaaaaaaaa!

            Krungu bojone mari soko salon gawe voucher Retno langsung nangis banter. Gak trimo, de’e ndeprok nang lante trus gidro-gidro.

            ”Lah, lapo kon iku dek?”

            Joko bingung ndelok bojone nangis. Panjul sing lagi enak-enak mangan es krim yo melu bingung, wedi malah.

            ”Balekno! Balekno vouchere! Ijoli pokoke! Huaaaaaaaaaaaa!”

            ”Sik ta lah, jaremu dino iki awake dewe ijol angon? Lha aku iki mung manut omonganmu lho dek.”

            ”Ijoli, gak trimo aku! Voucherku rek, lek ngenteni taunan malah tok gawe. Kebangetan sampeyan iku! Ijoli!”

            ”Lha wes kadung. Suk ae lek oleh rejeki tak ijoli.”

            ”Suk kapan? Lek wes kiamat? Sampeyan lak iso takok disik, lapo kok langsung digawe? Hua! Hua!”

            Retno sik nangis banter. Panjul mulai membik-membik kate nangis trus nyedek bapake.

            ”Kon lho turu koyok wong mati. Ngko lek tak tangekno mesti aku sing tok salahno maneh. Wes, ojok koyok arek cilik. Eling dek, kon iku wes duwe anak. Ojo koyok prawan ae polahmu.”

            ”Bahno! Mbencekno ancene sampeyan. Ijoli!”

            “Piro sih regane?”

            “Iku wingi oleh gratis mergo aku melu undian. Lek pakete dewe yo limang atus ewu!”

            ”Lha duite sopo sak munu akehe?”

            ”Mbuh, pikiren lho, wong sampeyan sing ngentekno!”

            Retno sik durung mari lek mangkel, sik nangis. Joko mung iso gedek-gedek ndelok kelakuan bojone.

            ”Pak, emak edan ta?”

            ”Sttt, emak gak edan. Mung rodo konslet ae,” bisike nang anake.

            Gak ngerti kudu yok opo maneh, Joko melu nglesot nang sandinge bojone iku.

            ”Trus karepmu yok opo saiki? Wes kadung entek vouchere, tok tangisi yo gak bakal mbalik. Ojok aneh-aneh ngunu ta. Gak isin karo anakmu ta? Deloken kae tonggo-tonggo yo podo krungu. Wes, meneng.”

            Retno gak gelem nyawang bojone. Sikile sik jejek-jejek, mangkel. Panjul dirangkul bapake. Lambene cemot kabeh mergo mangan es krim.

            ”Kon nyesel ta kawin karo aku? Gak eling jaremu biyen, soro seneng bakal tok tompo. Aku gak mekso kon kawin karo aku tapi ketoke kon kok nyesel. Sik soro ngene ae kon wes gak kuat. Mari iki iso ae uripe kene luweh soro maneh. Opo kon kate ninggalno aku karo anakmu?”

             Joko meneng. Retno sik membik-membik.

            ”Yo gak popo lek awakmu wes gak kuat urip soro karo aku. Lek awakmu kate muleh nang bapakmu yo gak popo. Aku ikhlas.”

            Krungu omongane bojone sing melas, Retno maleh gak tego. Sitik-sitik lek nangis selot lirih.

            ”Gak,” Retno nyauri lirih.

            ”Lek gak yo ojok koyok ngunu. Wes, meneng, isin karo tonggo. Sepurane yo, aku sik durung iso gawe kon seneng.”

            ”Gak popo,” Retno ngusap eluhe.

            “Tapi aku njaluk es krim,” jarene maneh.

            ”Yo, ngko mari mbecak tak tukokno.“

            ”Emoh, nyaluk saiki.“

            ”Lha durung kerjo yo durung oleh duit.“

            ”Iku, njaluk ta‘ane tole,“ nunjuk es krime Panjul.

            ”Ojok! Oya oyeh!“

            ”Paringi emake le, gak oleh cetil ngunu iku,“ rayune Joko nang Panjul. ”Ngko emak nangis maneh lho.“

            ”Sithik ae, gak oyeh akeh-akeh.“

            ”Hooh,“ jawabe Retno karo manthuk-manthuk.

            Panjul ngewehno es krime nang emake. Retno langsung nampani trus njilati es krime Panjul sing oleh dikei soko pegawai salon Barbara pas diajak bapake mau.

            ”Sing rukun karo anake. Aku tak kerjo disik. Gak oleh gelutan lho yo?”

            ”O..oh,” saure Panjul.

            ”Ngko lek oleh penumpang akeh jaluk ditukokno opo?”

            ”Sego padang,” saure Retno.

            ”Gawe lendang!” tambahe Panjul.

            ”Iyo tapi lek gak oleh penumpang akeh sego lawuh gerih lho yo, koyok biasane.”

            Retno karo Panjul manthuk bareng-bareng.

***

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s